尋晚出席咗 【Metropop x Kano blogger試影會】, 真係好多謝 Metropop PR小姐嘅邀請， 真係好開心， 估唔到開始重新寫返blog會咁快有人賞識 (≧∇≦)
【電影大綱】
故事描述1929年台灣誕生了一支由漢民族、大和民族和原住民族組成的嘉農棒球隊，在新教練以「進軍甲子園」為目標，用斯巴達式的嚴厲態度訓練球員，原本散漫的球隊在教練一年多的魔鬼訓練與屢屢落敗的刺激下，漸漸激發了球員的求勝意志與前進甲子園的決心。1931年，嘉農棒球隊一路過關斬將，打敗由日本人所組的常勝冠軍「台北商業隊」，成為首支在濁水溪以南並且贏得全島冠軍的棒球隊外，更代表台灣去日本征戰甲子園。 (資料來源: Yahoo 電影)
【包包觀後感】
起初收到電郵， 上網了解過電影資料， 雖然知道依套戲係由台灣監製魏德聖，即係《海角七號》同《賽德克。巴萊》同一個監製，但再一見到片長有3個幾鐘， 而且仲要講野球， 心諗:「會唔會悶到訓著架?!」。點知越睇落去越好睇， 中間仲有唔少笑位、感動位添! 去到最後亦令人好緊張、心情好激動！就等我慢慢剖析喇~
【時代背景】
故事發生嘅年代，正值台灣日治時期，所以戲中很多背景、戲服都好有日本復古風！而且當時嘅台灣人/原住民都係識日文。
【人物】
講真，開頭完全分唔清d人， 亦唔知佢地叫咩名， 到後期先搞清楚，原來想去嘉義嘅日本軍官就係「札幌商業野球隊」隊長 ─ 錠者！
教練 ─ 近藤兵太郎由永瀬正敏飾演。永瀬發得得淋漓盡致，完全能夠演繹出日本傳統男人嘅霸氣同內斂性格！為咗球隊有資金營運，努力說服贊助商！可惜被人嘲笑喺一支雞尾酒球隊 (因隊員是由日本人、漢人、台灣原住民組成)，心裡面自責有錢去應酬，但冇錢買糧食畀隊員。結果連自己積蓄都拎埋出嚟，佢嘅太太親身煮麵畀大家充飢~
此外，我睇咗十幾分鐘，就開始覺得佢好似音樂情人鄭子誠，大家話係咪呢? XD
隊中王牌 ─ 吳明捷 (Akira)則由同樣係棒球員嘅曹佑寧飾演。高瘦而且樣貌俊朗，好有青春氣息！戲中末段，就算手指已甩哂皮、流哂血，都仍然無放棄比賽，繼續投球，甚至乎將流血嘅手，插入沙地，減少因為血液而滑手嘅情況，令人偑服！
嘉農隊隊員 ─ 喺一班從未贏過任何比賽嘅青年，但佢哋有嘅....係對打棒球嘅熱誠，同永不服輸嘅精神。教練亦不斷提點佢哋：「 球場上不要只想著贏，要想著不能輸!」
【戲中笑位】
濱田老師用咗「木瓜同釘子」嘅理論：「我種嘅木瓜能夠生得肥大，係因為打咗一支鐵釘落樹嘅根部，令樹以為自己好快就死而催化生存本能，使果實更肥大。」，從而教導隊員要有『明知道會輸，都要有全力以赴』嘅精神！所以，當對手質疑點解Akira傷身咁都唔放棄，佢都會用依個道理嚟答對手。在場嘅觀眾都會一齊笑咗出嚟~ XDD
就係依種精神，感動到錠者同之前嘲笑過Kano隊嘅記者，同時贏得在場5萬幾個觀眾『天下嘉農』嘅讚賞！
【總結】
劇情最後真係拖得耐咗少少，而且有部份CG 做得真係好雞~ 不過依套戲嘅重點唔係睇特技效果！
而尾段Kano同對手中京隊拉鋸時，成個戲院都瀰漫住緊張嘅氣氛，大家都好似現場觀眾咁，都好想知到最後會唔會贏到。而Kano隊嘅熱血精神，亦都感動到我！導演馬志翔，你成功帶起我哋嘅情緒，真係要畀個讚你！真係好耐無睇過一套咁勵志嘅電影~
發佈留言