相信好多絲打都有同樣煩惱，就係唔知買咩畀身邊嘅男性朋友或男友。最近，包包要準備買生日禮物畀最老死嘅 M先生。行過旺角、尖咀，都搵唔到啱心水嘅嘢做禮物，但偏偏變左買嘢畀自己 ＝口＝" 大家都會有同樣情況嘛？
既然出街搵唔到啱心水，我就決定上網搵下有冇嘢啱。當然首選淘寶喇～ 先講一下買咩畀男仔最好，當然係電子產品啦！十個男仔九個都實鍾意，不過電子產品實在太貴，除非係男友或老公，否則一般朋友或老死都唔會咁破費。
另一個選擇就係玩具 figure 喇～ 但一定要好了解對方鍾意邊款figure，如果買錯的話就盞搞，而且又未別個個男仔都鍾意依味！
包包我就比較鍾意買D實用嘅嘢畀朋友，就算佢唔啱用，佢都可以畀屋企人用。所以我就search 背包，一淘之後，見到由都教授最近電視成日賣廣告嘅Samsonite RED。價錢唔平之外，仲要個款都幾娘，四四方方完全好似足日本小學生嘅書包咁⋯⋯咁鬼娘，當然淘唔落手喇~
於是我又搵到另一款，話就話係韓國品牌SCOU，行簡單自然路線。但我睇落嗰款有D抄加拿大品牌Herschel。
淘寶店鋪名：韓國男裝代購
若果以同樣價錢嚟講，我會揀Herschel! 一來我平時都有上開去Zalora 睇嘢同買嘢，見入面都有Herschel 袋賣，二來亦見過舊同事潮人P揹過依個牌子嘅袋。真係幾型~
所以我再上網睇下有咩款啱....結果畀我發現原來LCX 有Store！於是乎上個禮拜日，我碌咗出去老尖睇下......
袋款同顏色都幾多，唔會獨孤一味全黑色，而且摸上手質地幾好~ 價錢由三百幾至過千都有!
Zalora 官方網店: Herschel Bag
由於我budget 有限，最後我揀咗右上嗰個波點notebook袋 (依個袋只係350咋)！貪佢夠特別，入面仲有絨毛內里添~ 實唔怕括花部機喇~
同場加映：我都試咗2款單膊袋，我比較鍾意右邊白色撞奶綠色依款，個袋夠大！啱哂我依d 唔鍾意執袋嘅女仔....咩都可以倒哂入去XDD
不過呢....最近買左好多化妝品同護膚品，所以唔敢再買住....惟有留返下個月先喇~
想知更多電影相關資訊、影評，請關注及訂閱↓↓↓
【Facebook 粉絲專頁 】: http://www.facebook.com/Mind2Wild
【Youtube 頻道】： http://bit.ly/1SB5cmq
★ ☆★ ☆★ ☆★ ☆★ ☆★ ☆★ ☆★ ☆★ ☆
★ ☆★ ☆★ ☆★ ☆★ ☆★ ☆★ ☆★ ☆★ ☆
發佈留言