【影評】唔夠進擊的《賤鄰50》Bad Neighbours

由《老爆伴郎團》喪玩監製， 《乜都得先生》搞GAG王執導爆笑街坊大激鬥！寫到咁吸引，無理由唔睇啫～ 到底會唔會堅好笑？定話係中哂伏？等包包寫份包膠 （報告）畀大家～

【故事大綱】

Mac (薛夫洛根 飾) 同Kelly (露絲拜恩 飾) 生咗個可愛baby，一家三口樂也融融，呢個時候隔離吉屋終於有新鄰居搬入，50個大學生以Teddy (碩克艾佛朗 飾)為首，以此屋作為學生會私竇。呢班巴打絲打晚晚開P，飲酒隊草講粗口，唔夠瘋狂唔罷休，將原本平靜和諧嘅社區整到烏煙瘴氣。Mac同Kelly兩夫婦原本想靜靜雞報警搞掂，點知被警察踢爆，鄰里大戰從此一發不可收拾。

【包包觀後感】

一睇個戲名都知係關於衰鄰居同點樣大家互相整蠱，故事簡單又直接～ 照計，戲肉應該係Mac 同Teddy 會用咩「賤招」對付對方。但好可惜⋯⋯招數唔夠賤又唔夠別出心裁！白白浪費依個電影concept~

先講下點解Mac 同Kelly 要整蠱 Teddy呢？ 係因為學生會晚晚開始Party 嘈到佢地無得瞓？No No No 依個唔係主因～ 而係佢地兩個初為人父母，根本仲未適應新身父母依個身份! 好似朋友撩佢地去蒲，心思思但又要湊住個女，結果都係蒲唔成，於是就將精力及視線轉移落依班 「Bad Neighbours」身上。


【以下內容含劇透】如果唔打算入場睇嘅朋友仔，大可以放心睇～ 

無聊整蠱招數 (1)： Teddy將Mac花園灌木剪到好意淫，當阿Mac 行到過去嗰陣，感覺就係似搞緊野咁。依個笑點OK，但唔算賤......

無聊整蠱招數 (2)：再嚟拆走阿Mac 架車嘅 Air Bags, 再裝係佢公司、屋企sofa等等，依招算夠狠！同埋點解又入人地公司整陷阱呢？完全由編劇自己玩哂

無聊整蠱招數 (3)：Teddy 同Mac 隻揪時，隨手拎起嘅JJ 模型，由於長度問題，Teddy惟有將武器塞入對方口中，務求戰勝。依一度真係純為搞笑而搞笑，反而我覺得多年前嘅《凸務之王 Dr. Evil 》賤位同笑位做得好好多～

無聊整蠱招數 (4)：靚仔Teddy & Pete 大玩經典電影角色RPG，不停同 Mac 講 : 「Are you talking to me? 」外國人或者會覺好好笑，但sorry⋯⋯ 對於我依 D 土生土長嘅港女嚟講，我唔覺得咁好笑！

其實依套最大賣點，就係依位咁可愛、咁得意嘅BB女！唔講你唔知，其實戲入面依個BB係由一對孖女飾演，佢哋個名分別係 Elise Vargas 同 Zoey Vargas！

【總括】依套戲嘅笑位同賤位都唔算好到肉，如果你笑點低、或者一向都生活得好美國化的話就會覺得好睇。另外，只要大家留心再睇返 Youtube Trailer，就會發現香港版刪剪左廁所整蠱嗰一幕～ 完全唔明點解要剪左佢囉⋯⋯不過，整體故事架構會好過《紅van》，所以我會畀佢 55分！