好耐都無係度講下近期睇過啲咩，係時候update一下。最近睇咗《咒術屍戰》，對我嚟講係一般，唔太差唔係話好睇。點解咁講呢~
首先要講講依套戲基本要知嘅資料，佢喺由韓劇《謗法》衍生出嚟嘅電影版，你可以話佢係續集，又可以話佢係外傳，但我個人覺得係偏向似續集嘅獨立故事。
再嚟我要利申一下，睇嗰陣我係事前無睇過套劇，所以睇戲期間會對某啲劇情會有少少唔明，但唔會影響觀感同之後嘅理解。
好喇~ 係有哂依D 大前提之下，講講觀感。戲入面嗰啲所「喪屍」並唔係平時睇開TWD嗰種喪屍，只係屍體被咒術操控，好快打柴，加上屍體嘅扭動其實同《屍殺列車》差唔多，自然鮮度不足。如果要比較嘅話，我反而覺得劇集版有某啲場影嘅屍體扭曲度會好睇過電影版。(補充：睇完套戲，我走咗去追劇，暫時睇咗一半)
其次電影版嘅劇情其實都好套路，難聽啲講係老土，不過係故事表達方式用新手法包裝，以謗法宇宙觀去睇成件事係無問題嘅，不過如果你一心追求緊張刺激感嘅話，你會對依套戲失望。
所以如果無追劇的話，真係會唔知發生乜嘢事。因此我建議大家都係追咗套劇先去睇會比較好啲，但唔追劇去睇都無傷大雅，只會覺得套戲唔好睇。
既然講開，咁我順便講埋《謗法》依套韓劇嘅心得，節奏上都係偏慢，但描述謗法嘅原理及來歷比較詳盡，而且劇情一直刻意賣弄奸角體內嘅惡鬼嘅來頭，所以吸引到我繼續追落去 (但無耐性嘅人都唔適合睇依套劇)。
可惜依套劇最筆敗係女主角之一嘅林珍熙(女記者)同佢老公鄭成俊之間嘅支線，兩個人無乜身體接觸 (唔好講話攬攬鍚錫，連拖手嗰D都無乜)，對話似同事多過似兩公婆，總之兩個人之間互動好差，影響觀感。
電影總分：4/10
✅Facebook 專頁 : 莎包 Mind Too Wild電影誌
※聲明：本站所有圖片由出租DVD擷取或是由Google搜尋轉貼，該影像財產權仍屬該公司版權所有，如有侵權煩請告知，本人會立即移除。※
發佈留言