《凶靈祭 / The Medium》(台譯: 薩滿) 未喺香港上映之前已有留意，只見台灣某個知名影評人形容依套戲會毀三觀，有其他KOL就話令人不寒而慄，加上本片由《哭聲》嘅導演羅泓軫當編劇，開頭對套戲期望係幾高嘅~ 但睇完之後，我只可以話中哂伏！
以下有劇透成份：
先講啲基本電影資料，依套戲以類似偽紀錄片手法拍攝，講述泰國東北部有條細村莊，啲當地人都好鬼迷信，而尼姆就係當地一個繼承家族信仰嘅靈媒 (薩滿)，之後佢個外甥女阿敏行徑越黎越怪異，初時以為阿敏被「降神」，不過最後發現喺被多個惡靈附身，結局當然係成家冚胞散喇！
前段又長又悶都算，都係估佢想鋪排多少少嘢，等後半段高潮反差大啲，但最後30分鐘真心DKLM，而且越睇越多BUGS，就好似尼姆一家為阿敏搞個盛大嘅驅鬼儀式，準備期間由得阿敏通屋走，夜晚嚇完舅母再抱埋表弟出去，嚇到個舅父鼻哥窿都無肉，但到咗儀式當日先將阿敏封印喺間房度，係咪好唔合理先? (正常都一直鎖住條女，驅么之前都唔畀佢亂嚟)
到驅鬼儀式當日，起哂點知尼姆無啦啦「被神召」死咗，然後佢老母又走去代替阿敏出席驅鬼儀式，跟住一個屈尾十話自己被降神，但又做埋啲破壞驅鬼儀式嘅行為(倒插香燭)，直到阿敏再出現嗰陣佢又淆哂底。到底佢想點先?
其實我睇得出編導係想藉意帶出「當真的有需要時，你的信仰有沒有幫助」、「到底時神是否真的存在？」的議題，可惜執行上我覺得表達不好，特別係後半段，突然間嚟個《死亡習作》Mode，然後無啦啦變成喪屍片，睇到個人好迷失。到完場嗰陣，我只係覺得成套戲想透過尼姆引證「神」嘅存在，結局只係話畀你知：「神呢！真係唔知有冇，但真係有惡靈 (魔鬼) 嘅~」
如果要拎依套戲同《哭聲》比，真係蚊比同牛蚊喇~ 所以無比較就無傷害。
總分：1/10
✅Facebook 專頁 : 莎包 Mind Too Wild電影誌
發佈留言