【觀後感】《絕路狂逃 / Escape From Mogadishu》：好評都是過譽，趙寅成英文超爛影響觀感

未睇 《絕路狂逃 / Escape From Mogadishu》之前，見網路上個個都話依套好睇，絕無冷場，於是再一次抱好大期望去睇，結果我覺得吹過大，有啲過譽。

話就話故事係由真人真事改編，但我相信現實之中，被派出去做外交官同參事官嘅人，英文程度應該唔會太差，但係套戲偏偏搵個英文爛到一個極點嘅趙寅成去演參事官，說服力好弱，繼而影響觀看嘅投入感。

為咗公平少少，我上網求證過，到底係咪誤會咗趙寅成，但Google Search 嘅結果話我知：「唔係」，好多報導都話佢講太多英文台詞令佢大崩潰。喂~ 人哋梁潮偉拍《尚氣》都有苦練英文喇，你睇點解人地出嚟效果幾好，你(趙寅成)就講到一坨屎咁呀? 咁即係選角上有問題喇！其實我覺得搵玄彬或者李秉憲 (佢哋2個英文有一定程度)去做姜大振依個角色，套戲一定好睇好多！

好返翻嚟正題，至於坊間大讚嘅「南北韓喺危難之中，放下成見共同逃亡」主線令人好感動，我覺得前期鋪述雙方嘅衝突唔夠深，以至後後期共同逃亡嘅感染力不足，而且佢地一班人逃亡嘅經歷又過份簡單，只係揸車嗰陣畀叛軍掃射下，驚險嘅程度相比同類型題材嘅戲，算係小兒科喇~

總括嚟講，成場戲我都睇得幾辛苦，依家諗返轉頭上個禮拜睇嘅《殺無舍》都仲好睇過佢...

總分：1/10 

✅Facebook 專頁 : 莎包 Mind Too Wild電影誌

📍 加入 MEWE【電影劇集中伏分享區】盡情劇透、爆雷

✅喜歡我的文章，請按分享／Share！

📣Follow IG ▶️instagram.com/mind2wild

※聲明：本站所有圖片由出租DVD擷取或是由Google搜尋轉貼，該影像財產權仍屬該公司版權所有，如有侵權煩請告知，本人會立即移除。※